Ысык-Көлдүн Ак-Суу районунун Октябрь айыл өкмөтүнө караган 3 мектептин алдыңкы окуучулары Караколдогу тоо-лыжалык базасында акысыз эс алышты. Бул тууралуу Октябрь айыл аймагынын башчысы Бактыбек Акмолдоев билдирди. Анын айтымында, демөөрчүлөрдүн колдоосу менен 21 окуучу жана 6 мугалим лыжа базасында эс алды.
— Мыкты окуган окуучуларга стимул берүү максатында демөөрчүлөр менен сүйлөшүп, аларга эс алуу уюштурууну демилгелегенбиз. Балдарды көзөмөлдөө үчүн ар бир мектептен эки мугалим барды. Жалпы 21 окуучу жана 6 мугалим жаратылыш койнунда эс алды, — дейт Бактыбек Акмолдоев.
Акмолдоев кимдер демөөрчүлүк кылганын айткан жок.