Президент Сооронбай Жээнбеков Жаңы жылдын алдында 2010-жылдагы Апрель революциясынын катышуучулары, жабыркагандар жана курман болгондордун туугандары менен жолугушту. Бул тууралуу Президенттик Аппараттын маалымат кызматы билдирди.
Жолугушуунун катышуучулары Апрель революциясынын катышуучуларына, курман болгондордун үй-бүлөлөрүнө жана жакындарына көрсөтүлүп жаткан колдоого ыраазычылык билдиришти.
Коррупцияга каршы күрөш, өлкөнү санариптештирүү, өлкөнү социалдык-экономикалык жактан өнүктүрүү жана башка системдик өзгөрүүлөр боюнча президенттик багыттарды колдоорун билдиришти.
Жолугушуунун катышуучулары Апрель революциясынын 10 жылдыгын уюштурууга байланыштуу маселелерди, айрым мамлекеттик жана жергиликтүү бийлик органдарынын ашыкча бюрократиялашуу маселелерин көтөрүштү.
Президент өлкөнүн тарыхында Апрель революциясынын өзгөчө орду бар экенин белгилеп, анын идеяларын бекемдөө жана толук ишке ашыруунун маанисин баса белгиледи.
Сооронбай Жээнбеков Апрель революциясынын 10 жылдыгына даярдануу жана аны өткөрүү боюнча иш-чараларды уюштуруу комитети тарабынан тийиштүү деңгээлде иштер жүргүзүлүп жаткандыгын белгиледи.
Жолугушууга «Мекен Шейиттери», «Эр Теги», «Баатырларга таазим», «Жаркын Элес», «Апрель Баатырлары», «Айкөл Ала-Тоо», «Апрель. Элим. Кыргызстан», «Айкөл Таза Коом», «Апрель Баатырлар Биримдиги», «Апрель байрагы», «Элдик сакчы», «Элдик кайрат», «Мекен үчүн», «Орток шамы» коомдук уюмдарынын, «Патриот» элдик кошуундар кыймылынын өкүлдөрү катышышты.
Буга чейин алар менен Мамлекет башчысы ушул жылдын 2-апрелинде Апрель революциясынын кезектеги жылдыгынын алдында жолугушкан.