Кырсыкка учурага Чилинин аскердик учагын издөө иштери уланууда. Бул тууралуу өлкөнүн Коргоо министри Альберто Эспина маалымдады.
-Бортунда 38 адам болгон учакты тапканча күнү-түнү издейбиз. Тирүүлөрдү табуу мүмкүнчүлүгү жокко эсе болгону менен, издөө аракеттерибиз уланат,- деди Эспина.
Учак Кыргызстандын сааты менен алганда 10-декабрь күнү таңкы үчтөрдө авиабазадан чыгып кеткен. Учкандан бир саат 15 мүнөт өткөн соң байланыш жоголгон.
«Учак кыйрады» деген маалымат байланыш үзүлгөндөн 8 саат өткөн соң билдирилди.
Учурда чилиликтер өздөрү жана чет элдик учактар да жоголгон учакты издөө иштерин жүргүзүшүүдө.
Кыйраган борт Антарктидадагы авиабазаны көздөй учкан. Ичинде 38 адам: он жети экипаж мүчөсү жана 21 жүргүнчү болгон.