Билим берүү жана илим министринин орун басары Нурлан Омуров Белгиянын Брюссель шаарында өткөн «Билим берүү аркылуу туруктуу келечекке» деп аталган борборазиялык конференцияга катышты.
Бул тууралуу министрликтин маалымат кызматы кабарлады.
Иш-чарада Европа биримдиги жана Борбор Азия мамлекеттеринин жогорку деңгээлдеги эскперттери билим берүү, инновация жана жумушка орноштуруунун өз ара байланыштарын талкуулашты. Конференция Европа биримдиги кабыл алган жаңы стратегияны колдоо үчүн иш-аракеттер менен программаларды бириктирүүгө багытталды.
Нурлан Омуров Европа биримдиги Борбор Азия аймагын “Эразмус+”, “Борборазиялык билим берүү платформасы” сыяктуу эффективдүү программалар аркылуу колдоп келе жатканын белгилеп, эмгек базары талап кылган ишке орношуу үчүн маанилүү болгон тажрыйбаларды өнүктүрүүгө багытталган жогорку жана кесиптик-техникалык билим берүүгө басым жасаганын билдирет:
«Конференция аймактагы жаштарды жана билим берүүнү колдоого алган Европа биримдигинин ролун баалоого жана региондогу кызматташууну өнүктүрүүнүн жолдорун табууга жардам бере алды. Мындан аркы кызматташуунун негизги багыты катарында: ЖОЖдордо илимди өнүктүрүү, улуттук квалификация системасы тармагында кызматташууну өнүктүрүү, Европа биримдиги өлкөлөрүндөгү эксперттердин катышуусу менен Phd даражасын коргоо, креативдүү индустрия үчүн кадрларды даярдоо жана Борбор Азияда Европа университетин түзүү сунушталды«, — дейт Нурлан Омуров.