Өзбекстандагы Бухара облусунун Гиждуван районунун тургуну “көп аялдуулук” беренеси менен бир жылга эркинен ажырыталды.
Жергиликтүү басылмалар жазгандай, соттолгон киши узак убакыт жубайы менен жашаган, 2 кызы бар. Расмий никесине карабай, 2016-жылы экинчи жолу үйлөнгөн. Ал аялы ооруп калып, уул төрөп бере албагандыктан ушундай кадамга барганын айткан.
2018-жылы экинчи аялы уул төрөгөн. Сот жараяны учурунда айыпталуучу күнөөсүн мойнуна алган. Бирок экинчи ирет никеге турганына карабай, биринчи үй-бүлөсүнө да жакшы шарт түзүп бергенин, эки кызын багып келгенин белгилеген.
Өзбекстандын Кылмыш кодексинин “Көп аялдуулук” беренесине ылайык, сот аны бир жылга эркинен ажыраткан.