Мамлекеттик чек ара кызматынын Нарын аймактык бөлүмү ИИМдин жана УКМКнын кызматкерлери менен биргеликте Нарын облусунун бир катар жайлоолоруна текшерүү жүргүздү. Бул тууралуу чек ара кызматынын маалымат бөлүмү билдирди.
«Тилектештик-2019» атайын операциясынын алкагында жүргүзүлгөн иликтөө учурунда Дары-Суу жайлоосундагы 1966-жылы туулган Ж.А.нын үйүнөн мыйзамсыз сакталган «ТОЗ-8» кесилген мылтыгын ок-дарысы менен таап алышты.
Ушундай эле текшерүү Адыбай жайлоосунда да жүргүзүлүп, 1967-жылы туулган Т. И. аттуу жарандын үйүнөн мылтыктын ок-дарыларын жана 4 килограмм кийик этин алышкан.
Мыйзамсыз курал-жарак, ок-дарылар Нарын облустук Ички иштер башкармалыгына, кийиктин эти Айлана-чөйрөнү коргоо жана токой чарба агенттигинин Нарын облустук бөлүмүнө өткөрүлүп берилди. Учурда алар экспертиза жүргүзүп жатышат.