Баткен облусунун Кадамжай районунун Көтөрмө айылынын тургуну Айзада Арзыбаева айылга бала бакча уюштурду.
46 жаштагы демилгечи айымдын айтымында, ал демөөрчүлөрдүн жардамы өз үйүнүн короосуна боз үй тигип, 3 жаштан 14 жашка чейинки 30 баланы кабыл алган. Балдар эртең мененки саат 9:00дө келип, кайра саат 14:00дө үйлөрүнө кетишет. Бирок талаа жумуштары башталгандыктан айрым учурларда кечке чейин калып калышат. Балдарга жумасына 2-3 жолу сабак өтүлүп турат.
«Балдарга китеп окуп берип, кол өнөрчүлүктү үйрөтүп жатабыз. Демөөрчүлөр да колдоо көрсөтсө, 2-3 жерге боз үй тигип, балдарга мектепке чейинки билим берүүнү пландап жатабыз», — деди А.Арзыбаева.
Боз үйлөрдөн уюштурулган бала бакча «Нур-Үлгү» деп аталат. Аны жетектеген Айзада Арзыбаева 3 жылдан бери жайлоо бала бакчаларында балдарды тарбиялап келген.