Мыйзамга ылайык, Экономика министрлиги атайын уруксат бермейин биз, экологиялык жана техникалык коопсуздук боюнча инспекциянын кызматкерлери Солтон-Сарыдагы мал-жандыктын өлүмү боюнча текшерүү жүргүзө албайбыз, байкоо гана салабыз. Мындай пикирин аталган инспекциянын Нарын облусу боюнча башкармалыгынын орун басары Жаныбек Турдукеев билдирди.
Анын айтымында, өткөн жуманын соңунда Экотехинспекциянын кызматкерлери Солтон-Сарыга барып, эл менен жолугушуп, абалга байкоо салып келишкен.
«Биз мамлекеттик айлана чөйрөнү коргоо агенттигинен Солтон-Сарынын суулары, топурагы боюнча лабораториялык анализдердин жыйынтыгын сурап жатабыз. Негизинен кен иштеткен аймактын экологиясына мониторингди ошол кызмат жүргүзөт,» — деди Турдукеев.
Ошондой эле, Экотехинспекциянын кызматкерлери комиссия менен бирге байкоо жүргүзүп, өз милдеттерине ылайык иштерди аткара тургандыгын кошумчалады.
Эске салсак, учурда Солтон-Сарыдагы мал-жандык белгисиз оорудан улам көп өлүмгө учурап жатат. Жергиликтүү малчылар муну жайлоодогу алтын кенин казып жаткан кытайлык инвесторлордун нитроглицерин заты менен жерди жардыруусунан улам ууланып жатат деген пикирде.