Жыл сайын июль айынын биринчи жекшемби күнү медицина кызматкерлеринин күнү белгиленет. Мына ошол кесиптин өкүлдөрүнүн күнүнө карата статистикалык маалыматтарды сунуштайбыз:
2018-жылы Кыргызстанда 187 оорукана, баштапкы медициналык-санитардык жардам көрсөтүүчү 46 уюм, 2 медициналык тез жардам көрсөтүү боюнча өз алдынча станция жана башка уюмдардын курамына кирген 139 бөлүм элге медициналык жардам көрсөтүштү. Аймактык ооруканалардын жана үй-бүлөлүк дарыгерлер борборлорунун базасында 29 жалпы дарыгерлик тажрыйба борбору иштеди.
2018-жылы элди ооруканага жаткыруу аркылуу 187 оорукана уюмдары медициналык дарылоо жардамын көрсөтүштү, алардын ичинен 135и Саламаттыкты сактоо министрлигинин системасында, 44ү медициналык-санитардык бөлүктө, ошондой эле, 5и мейманканалар жана ооруканалар бөлүгүндө иш жүргүзүшкөн.
2018-жылы 14,1 миң дарыгер жана 35,6 миң орто медициналык кызматкер медициналык-санитардык жардам көрсөтүүнү камсыз кылышты. Өлкө калкынын 10 миңине деп алганда, 22 врач дарыгер жана 56 орто медициналык кызматкер туура келди.
2018-жылы терапевт (3,9 миң адам) жана хирург (2,3 миң), тиш дарыгери (1,2 миң), акушер-гинеколог (1,1 миң) жана педиатр (800 ашык адам) кесибинде иштеген дарыгерлер эң көп экени аныкталды.