Бишкектин чок ортосунда сабалып каза болгон Нигериянын жараны, «Cambridge School» тил үйрөтүү мекемесинин директору Тижжани Али Абубакар бүгүн жерге берилет. Бул тууралуу аталган мекеменин кызматкерлери кабарлады.
Али Абубакардын сөөгү Арча-Бешик конушундагы көрүстөнгө коюлат.
Учурда жаназа намазын өткөрүү иштери уюштурулуп жатат.
Маркумдун бир тууган агасы Бишкекке келди.
Эске сала кетсек, 2-июлда 1985-жылы туулган Нигерия жараны Улуттук госпиталга оор абалда түшкөндүгү кабарланган. Ошондон бери комадан чыга элек болчу. Ыкчам иликтөө иштеринин натыйжасында чет элдик жаранды сабоого шектүү катары 1997-жылы туулган К. Э. аттуу жигит кармалган.
Буга чейин премьер-министр Мухаммедкалый Абылгазиев шектүүнү таап чара көрүүнү, ал эми жабыркаган жаранга тийиштүү медициналык жардам көрсөтүүнү тапшырган эле.