Жогорку Соттун маалымат кызматы мурдагы Саламаттыкты сактоо министри Динара Сагынбаеванын үй камагына чыгарылганы боюнча түшүндүрмө берди.
«Бишкек шаарынын Биринчи Май райондук сотунун 22-майдагы чечими менен Башкы прокуратурага караштуу ыкчам-издөө ишин жана тергөөнү көзөмөлдөө башкармалыгынын прокурорунун өтүнүчү канааттандырылды. Сот Жазык-процесстик Кодексинин 118-беренесинин ченемдеринин жоболорун эске алып, шектүү Сагынбаевага карата баш коргоо чарасын 2019-жылдын 26-июнуна чейин анын жашаган жери боюнча үй камагына алмаштыруу чечимин кабыл алды. Ал сот залынан эле бошотулду», — деп айтылат билдирүүдө.
Эскерте кетсек, 2013-жылы мыйзамдагы ууру Азиз Батукаевдин абактан мөөнөтүнөн мурда бошотулушуна байланыштуу тергөөнүн алкагында экс-министр Динара Сагынбаева 15-майда камакка алынган.
Бул ишке байланыштуу мурдагы вице-премьер-министр Шамил Атаханов, Жазаларды аткаруу кызматынын төрагасынын мурунку кеңешчиси Калыбек Качкыналиев, онколог-дарыгер Эмил Макимбетов, лаборант Ирина Цопова жана бир катар тиешелүү кызматкерлер да камалган.