Эмгек жана социалдык өнүгүү министри Улукбек Кочкоров жана министрликтин кызматкерлери, «Мамлекеттик жөлөк пулдар жөнүндө» мыйзамдын аткарылышын көзөмөлдөөчү жумушчу топтун, өкмөттүк эмес уюмдардын өкүлдөрү Бишкек шаарындагы Ак-Бата жана Ак-Жар конушунун тургундары менен жолугушту. Бул тууралуу аталган министрликтин маалымат кызматы кабарлады.
Жолугушууда Бишкек шаарынын бир да районуна расмий карабаган жаңы конуштарда, дачаларда жашаган аз камсыз болгон үй-бүлөлөр мамлекеттик жөлөк пулдарды алууга мүмкүнчүлүгү жоктугу белгиленди.
Министр Улукбек Кочкоров учурда аймактык-административдик бирдик катары статусу жок аймакта (жаңы конушта, калктуу конушта), дача участогунда жашаган аз камсыз болгон үй-бүлөлөрдү жана эмгекке жарамсыз адамдардын бардыгын максималдуу түрдө мамлекеттик жөлөк пулдар менен камсыздоо максатында Өкмөттүн долбоору министрлик тарабынан иштелип чыккандыгын билдирди.
«Көбүнчө калктын аялуу катмары — ички миграцияда жүргөн жарандар жаңы конуштарда жашайт. Алар жашаган жери боюнча каттоого тура алышпайт жана белгилүү бир аймакта жашагандыгын тастыктоочу документ көрсөтө алышпайт. Бул нерсе аз камсыз болгон үй-бүлөлөрдүн мамлекеттик колдоого алынуусуна тоскоол болууда. Буга байланыштуу биз биринчи кезекте ички мигранттарды жөлөк пул менен камсыз кылган ченемди киргизип жатабыз», — дейт ал.
Ушундай эле жолугушуу бүгүн, 14-майда Свердлов районунун Дордой конушунда жана Биринчи май районунун Мурас конушунда да өтөт.