Оштун «Достук» командасы Улуу Жеңиштин урматына арналган көк бөрү боюнча республикалык мелдештин жогорку лигасында чемпион болду.
Алар финалдык беттеште эзелки атаандашы, Талас облусунун «Ынтымак» командасын 1:0 эсебинде утуп алды.
Беттеште «Достуктун» капитаны Таши Майлибашев беттештин үчүнчү бөлүгүнүн 10-мүнөтүндө тайказанга улак таштап, эсепти ачты. Бул эсеп беттештин аягына чейин сакталды. Ал эми Улуу Жеңиштин урматына арналган көк бөрү боюнча республикалык мелдештин жогорку лигасында үчүнчү орунду Чүйдүн «Сары-Өзөн» командасы ээлеген.
«Достук» командасы «Ынтымак» командасы менен өткөн жылы да финалга чыгып, оштук команда 3:2 эсебинде утуп алган болчу.
Биринчи орунду камсыздап, чемпион болгон «Достук» командасына 500 миң сом, экинчи орунду ээлеген «Ынтымак» командасына 250миң сом, ал эми үчүнчү орунду камсыздаган «Сары-Өзөн» командасына 120 миң сом акчалай байге берилди.
Мындан сырткары мыкты көк-бөрүчү жана мыкты ат аныкталып, акчалай сыйлыктар берилди.
Эске сала кетсек, быйыл Ысык-Көлдүн Чолпон-Ата шаарындагы ат майданда 9-май Улуу Жеңиш күнүнө жана кыргыздын белгилүү инсандары Сүймөнкул Чокморов менен Үсөн Кудайбергеновдун элесине арналган ат оюндарынын алкагында Көк-бөрү боюнча биринчи жана жогорку лигадагы командалардын республикалык мелдеши өттү.