Жарандык активист Акжолтой Тукунов «Марал» радиосуна берген маегинде президент Сооронбай Жээнбеков, өкмөт башчы Мухамедкалый Абылгазиев, Жогорку Кеңештин төргасы Дастан Жумабековго кайрылып, Кызыл-Омпол уран кени толугу менен жабылуусун талап кылды.
«Оппозиционерлер уран маселесин саясатка айлантпасын. Кен бир тараптуу жабылсын. Кен казууга жалпы эл каршы болуп жатса, өкмөт эмне себептен иштерди 3 айга токтотот? Абылгазиев менен кезигүүгө даярбыз. Кен казуу милларддаган киреше алып келсе да кереги жок. Биз туристтик иштерибиз менен жан багабыз. Жергиликтүү жана эл аралык журналисттерге айтарым, Майлы-Суу, Кажы-Сай, Миң-Кушка барып көргүлө. Президентке да кайрылам… Ысык-Көлгө 100 млрд. долларга чейин инвестиция тартып келе алабыз, бизге мүмкүнчүлүк бергиле», — дейт Тукунов.
Ал уран кенин чалгындоого лицензия алган «UrAsia in Kyrgyzstan» ЖЧКсыны элди экиге бөлгөнүн белгиледи.
Тукунов буга кошумча, «UrAsia in Kyrgyzstan» Кызыл-Омполдо чалгындоо иштерин жүргүзүп жатканын 3 ай мурда билгенин, мындан улам өкмөт кол коюлган келишимдерди расмий сайтына гана эмес, социалык тармактардагы баракчаларга да жайгаштырышы керек экенин айтып өттү.