Кыргызстан Мусулмандарынын Азирети Муфтийи Максатбек ажы Токтомушев Кыргызстандын Орусиядагы элчиси Аликбек Жекшенкулов менен жолугушту. Эки тараптуу жолугушууда кызматташууну бекемдөө, Орусия аймагындагы мекендештерибизге ыйман, адеп-ахлак, каада-салт, адал ырыскы, үй-бүлөнү сактоо, ата-энени, Мекенди сүйүү боюнча түшүндүрүү иштерин жүргүзүү жаатында пикир алышты. Бул тууралуу Муфтияттан билдирди.
«Кыргызстан Мусулмандарынын Дин Башкармалыгы Орусияда эмгектенип жаткан мекендештерибизге руханий жактан түшүндүрүү жана агартуу иштерин жүргүзүүгө даяр», — деди Азирети Муфтий.
Эки тараптуу жолугушууга Кыргызстан Мусулмандарынын Аалымдар Кеңешинин төрагасы Абибилла ажы Кадырбердиев, Муфтияттын Орусиядагы өкүлү Сүйүн ажы Жусубалиев жана Азирети Муфтийдин жардамчысы Улан ажы Ибраев катышты.