Курбанбай Искандаров мамлекеттик кызматтын этикасын бузгандыгы үчүн жумуштан алынды. Мындай маалыматты өкмөт башчы Мухаммедкалый Абылгазиев билдирди. Депутат Таабалды Тиллаев Өкмөттүн делимитация жана демаркация боюнча өкүлүнүн кызматтан эмне себептен алынышына кызыкты.
— Вице-премьер-министр Жеңиш Разаков менен күнөөсү жок деп иштешип жатам. Эгерде анын да күнөөсү тастыкталса, чара көрөбүз. Искандаровдун мага кабар бербей, башка жакта жүргөнү мамлекеттик кызматкердин этикасына жатпайт, — деди премьер-министр.
Депутат бул бир тараптуу чечим экенин эскертип, анда Жеңиш Разаковду да кызматтан четтетип турууну сунуш кылды. Ошондой эле бир сөз менен эле кызматтан алганын да сынга алды.