Саясатчы Равшан Жээнбеков «Марал» радиосуна берген маегинде өлкөдө чыңалуу бар экенин жана аны бийлик жаратып жатканын билдирди.
Анын баамында, чыңалууга мурдагы үзөңгүлөш адамдар бүгүн саясий оппонент катары калыптануусу, алардын бири-бирине ачуу сөздөрдү айтып, аны саясатта аргумент катары пайдалануусу түрткү болуп жатат.
Экинчиден, бийлик алмашкандан бери өлкөдө маанилүү өзгөрүү жок болгондуктан, эл арасында нааразычылыктар бар.
«Жаңы бийлик келген 1 жарым жылда эл ыраазы боло турган реформалар, адамдын турмушун жакшырткан кадамдар жасалган жок. Мамлекетте революция болсо, ал да бийликтин катасынын жыйынтыгы болуп эсептелет. Социалдык-экономикалык көйгөйлөр бийлик кетирген каталардан улам келип чыгат. Бийликте ар дайым саботаж бар, ал азыркы бийликте өзгөчө көп», — дейт Жээнбеков.
Ал буга кошумча, бийликте «паралич» пайда боло баштаганын, президент да, өкмөт башчы да маселелерди чечүүнү жайлатып салганын белгиледи.