Кыргызстандагы жаза аткаруу жайларында ар кандай өндүрүштүк цехтер иштей баштады. Бул тууралуу Жазаларды аткаруу мамлекеттик кызматынын башчысы Мелис Турганбаев «Марал» радиосуна билдирди. Анда ал 16-жаза аткаруу колониясында кирпич чыгаруучу цех ачылганын, анда 87 жаран жумуш менен камсыз болгонун айтты.
-Цехте иштеген жаза өтөөчүлөргө маяна төлөнөт. Айына 5 миллион даана кирпич чыгарылат. 1-колониядагы кирпич заводду кайра ишке киргизүү үчүн инвестор таптык. Ал эми айымдардын зонасында 120 адам тигүү цехинде иштеп жатышат.
Андан сырткары 3-жаза өтөөчү жайында нан бышыруучу 5 цех иштеп, Чүй облусундагы бардык жаза өтөөчү жайларды нан менен камсыздап жатканын да белгиледи. 45-бөлүмдө атайын тоок фермасы түзүлүп, Чүй облусундагы жайларды жумуртка менен камсыз кыларын айтты.
Турганбаевдин белгилешинче, алдыда бут кийим чыгаруучу цехти ишке киргизүү планы каралууда.