Бириккен Улуттар Уюмунун (БУУ) баш катчысы Антониу Гутерреш Ethiopian Airlines учагы кыйраганда каза болгондорго, анын ичинде БУУнун кызматкерлеринин кайтыш болгонуна байланыштуу көңүл айтты.
Бул тууралуу баш катчынын пресс-секретары Стефана Дюжаррик билдиргенин РИА новости жазды.
“Антониу Гутерреш Аддис-Абебадагы авиакырсыктан адамдардын каза болгонун кабыргасы кайышып кабыл алган. Баш катчы ошондой эле, каза болгондорго, анын ичинде БУУнун кызматкерлеринин кайтыш болгонуна байланыштуу алардын үй-бүлөсүнө, ошондой эле Эфиопия Өкмөтүнө жана элине терең кайгыруу менен көңүл айтып, аза-кайгысын тең бөлүшөт”, — деп айтылат маалыматта.
Дюжаррик бул каргашада набыт болгон БУУнун өкүлдөрүнүн чоо-жайын билүү үчүн БУУ эфиопия бийлиги менен байланышта болуп, алар менен тыгыз кызматташып жатат, деп билдирет.
Boeing 737 Max 8 жүргүнчү учагы Эфиопиядагы Дэбрэ-Зэйт шаарынын жанында кыйроого учурап, ичиндеги бардык жүргүнчү, учкучтар каза тапкан. Бортто 149 жүргүнчү жана экипаждын 8 мүчөсү болгон. Набыт кеткендердин арасында 35 мамлекеттин анын ичинде Орусия, Кытай өлкөлөрүнүн өкүлдөрү бар экени айтылат.