Бишкек шаарынын мурдагы мэрлери Кубанычбек Кулматов менен Албек Ибраимовдун кылмыш иштери бириктирилип, башталган соттук отурум кийинкиге калтырылды.
Соттук отурум Кубанычбек Касымбековдун судьялыгы менен башталган соттук отурумда экс-мэрлердин ишине байланыштуу дагы 12 кишиге айып коюлган. 14 айыпталуучунун айрымдарынын жактоочулары келбей калганына байланыштуу соттук териштирүү иштери 13-мартка жылдырылды.
Экс-мэрлердин жактоочусу Сергей Слесарев жана башка юристтер имараттын тардыгын, иштөөгө шарттын жоктугун, соттук процедуралардын бузулушун айтып даттанышты.
Кубанычбек Кулматов менен Албек Ибраимов «Калыс-Ордо» конушундагы мектептин курулушу боюнча коррупциялык ишке айыпталууда. Ошондуктан алардын иши бириктирилген.
Бишкектин Ленин райондук сотундагы отурумда журналисттер, айыпталуучулардын туугандары жана жакындары киргизилбей, видео жана сүрөт тартууга да тыюу салынды.