Чүй облусунда белгисиз бирөөлөр жубайларга ок чыгарып, алардын 310 миң доллар акчасын алып кетишкен. Бул тууралуу Чүй облустук ички иштер башкармалыгынын басма сөз кызматы билдирди.
6-мартта Аламүдүн райондук ИИБне жол кырсыгы тууралуу билдирүү келип түшкөн. Анда Беш-Күнгөй айылында белгисиз бирөөлөр «Тойота-Харриер» үлгүсүндөгү автоунаанын айдоочусуна кол салып, дээрлик 310 миң долларын алып кетишкен. Унаанын ичинде айдоочу жана анын жубайы болгон.
Алдын ала маалыматка ылайык, «Субару-Форестер» үлгүсүндөгү унаадан белгисиз адамдар тапанча менен чыгып, акчаны алып кетишкен.
Бул факты Кылмыштар менен жоруктардын бирдиктүү реестрине катталды. Учурда тиешелүү кызматтарга тапшырмалар берилип, ыкчам-иликтөө иштери уланууда.
Жабыркагандар ар кандай жаракаттар менен аймактык ооруканага жеткирилген.