Өткөн жылдын жайында Москвада жөө жүргүнчүлөрдү кокустан сүзүп алган Чыңгыз Анарбек уулу акталып, абактан бошотулду. Мындай маалыматты “Замандаш” партиясынан билдиришти.
Ага ылайык, үстүбүздөгү жылдын 8-февралында Смоленск облусунун соту Чыңгыз Анарбек уулун мөөнөтүнөн мурда бошотуу өкүмүн чыгарган.
«Башында прокурор абдан каршы болуп жатты. Азыр баары жакшы болуп бүттү. 2019-жылдын 19-февралында мени абактан чыгарышат. Бошоткон соң 10 күн кармашат экен. Кыргыз элимдин колдоосу үчүн ыраазымын”, — дейт Чыңгыз Анарбек уулу.
Эске салсак, 2018-жылы 16-июнда Москва шаарында футбол боюнча дүйнө чемпиондугу өтүп жаткан учурда такси жолдон чыгып, жөө бара жаткан кишилерди кокустан сүзүп алган. Унааны кыргызстандык жаран Чыңгыз Анарбек уулу башкарып бараткан.
2018-жылдын октябрь айында кыргызстандык жаранды Москва шаарынын Тверск соту 1 жыл 6 айга кара жумушка тартуу менен айлык маянасынан 15%ын кармай турган болуп, 3 жылга чейин авто унаа айдоо укугунан ажыраткан болчу.