Англиялык саясатчылардын делегациясы беш жылдан бери алгачкы ирет талаштуу Крым аймагына келишет. Бул тууралуу Риа новости жазды.
Маалыматка ылайык, 15 кишиден турган делегация Крымда өтө турчу V Ялта эл аралык экономикалык форумга катышат.
Крымдын жетекчиси Сергей Аксенев британиялыктар буга чейин бирин-экин келгени болбосо, топ болуп алгачкы ирет келерин билдирди. Анын айтымында жарым аралдын инвестициялык дарамети абдан жогору, муну аймак менен кызматташууну каалап жаткан тараптар да баалай аларын үммүттөнүүдө.
Ялта форуму- экономика тармагында жылына Крымда өтүүчү эл аралык иш чара. 2019-жылдагы жыйыны 17-20-апрель күндөрүнө пландалууда.
Эске салсак, башка Европа мамлекеттери сыяктуу Англия Крымдын аннекцияланышына каршылык билдирип, аймакты Украинага таандык деп таанышканын жарыялашкан. Буга байланыштуу Евробиримдик Орусияга бир катар ири санкцияларды киргизген. 2014-жылдан бери аталган санкциялар ар алты айда жаңыланып турат.