Кечээ, 31-январда Франциянын Биринчи айымы Брижит Макрондун саясаттагы орду тууралуу китеп жарыкка чыкты. «Madame La Presidente» аттуу китепти ак үйгө жакын адамдардын айтып берүүлөрүнө таянып журналисттер Ава Жамашиди менен Натаниел Шук жазган.
Китепте президент Эмманиуэл Макрондун жардамчылары менен Биринчи айымдын ортосунда жүргөн атаандашуу жана кызганычтар баяндалган.
«Президенттин жардамчылары аял киши менен тирешип көрбөгөн үчүн ыңгайын таба албай жатышат. Ортолорундагы абал ушунчалык курч, жадагалса Бриджит Макрондун өлүмүн самап калышкан»,-делет китепте.
Алар күндүзү президентке айткан сунуштары кечинде кабыл алынбай, эртеси такыр башка пикир менен келгенине кыжырданышат.
«Бриджит айым президенттин мээсинин оң жагы. Элизе сарайынын эшиктери жабылары менен биринчи айымдын таасири башталат»,-дешет алар.
Анткени өткөн жылы Билим берүү министрин дайындоодо жана Экология министрин кетирүүдө анын түздөн-түз роль ойногону белгилүү.
Эске салсак, Эммануэл Макрон Франциянын президенттигине 2017-жылы келген. Жубайы Бриджит Макрон анын мектептеги мугалими болгон. Өзүнөн 25 жаш улуу Биринчи айым анын саясаттагы эң чоң колдоочусу экени маалым.