Жогорку Кеңештин мурунку спикери Ахматбек Келдибеков, мурунку башкы прокурор Азимбек Бекназаров жана УКМКнын мурунку башчысы Кеңешбек Дүйшөбаев экс-президент Алмазбек Атамбаев жана ага таандык болгон «Апрель» телеканалынын директору Дмитрий Ложниковдун үстүнөн экинчи жолу арыз жазышты. Бул тууралуу даттануучулардын расмий өкүлү Динара Ашимова билдирди.
Буга чейин Бишкектин Октябрь райондук соту үч саясатчынын доо-арызын мыйзамга ылайык жазылбаганы үчүн артка кайтарган. Алар кемчиликтерин толуктап, бүгүн кайрадан сотко жиберишти.
Келдибеков, Бекназаров жана Дүйшөбаевдер Атамбаев аталган телеканалга берген интервьюсунда алардын беделине шек келтирип, моралдык зыянга учуратканы үчүн жалпысынан 18 миллион сомдук компенсация талап кылышууда.
Эске салсак, Ахматбек Келдибеков дагы үч ЖМК-«Kyrgyztoday», «Азия ньюс», «Аргумент.kg» менен соттошуп жатканы маалым.
Ал эми «Апрель» телеканалынын директору Ложников үч саясатчы менен соттошууга даяр экенин, аталган маекте фактты бурмалоо же ушак-айың болбогонун билдирүүдө.