25-августта Чолпон-Атада Евразия өкмөттөр аралык кеңешинин жыйыны өтөт

Евразия өкмөттөр аралык кеңешинин кезектеги жыйыны Ысык-Көл облусунун Чолпон-Ата шаарында 25-26-августта өтөт. Бул тууралуу Министрлер кабинетинин маалымат кызматы билдирди.

Жыйынга Министрлер кабинетинин төрагасы, Евразия өкмөттөр аралык кеңешинин төрагасы Акылбек Жапаров төрагалык кылат.

Иш-чарага Евразия экономикалык биримдигине кирген өлкөлөрдүн, байкоочу мамлекеттердин өкмөт башчылары, Евразия экономикалык комиссиясынын коллегиясынын төрагасы, ошондой эле чакырылган мамлекеттердин өкмөт башчылары катышат.

Жыйындын күн тартибинде уюмга мүчө болгон өлкөлөргө жалпы газ рыногун түзүү, өнөр жай кооперациясын каржылоо, алкоголдук рынокту жөнгө салуу, Евразиялык кайра камсыздандыруу компаниясын түзүү маселелери каралат.

Мындан тышкары, форумдун алкагында бир катар эки тараптуу жана көп тараптуу жолугушуулар уюштурулат.

Евразия өкмөттөр аралык кеңешинин жыйынынын алкагында КМШ жана ЕАЭБ өлкөлөрүнүн жаштарынын биринчи форуму өтөт, ага 200дөн ашык адам катышары күтүлүүдө.