Шашылыш кабар:

Дыйкан: Айыл чарба министрлиги кеңеш бербейт

Август 9th, 2018 | by Бахар Хакимова
Дыйкан: Айыл чарба министрлиги кеңеш бербейт
Күн чекит
0

Быйыл Ысык-Көл облусунун дыйкандары сарымсакты жылдагыдан көп эгишкен. Учурда түшүм жыйноо иштери аяктап, сарымсактын көлөмү жылдагыдан мол болду. Бирок баалар 10 эсе арзандап, кеткен чыгымды да актабай калганы айтылууда. Сарымсакты сактоочу жай да жок болгондуктан, дыйкандар 1 киллограмын 15-20 сомго сатууга аргасыз болушууда.

Дыйкандардын ушундай маселеси жөнүндө Айыл-чарба, тамак-аш өнөр жайы жана мелиорация министрлиги билеби, кандай жардам берилет же болбосо алдын ала тийиштүү кеңештер берилди беле? Суроолорубузга программасына Айыл-чарба, тамак-аш өнөр жайы жана мелиорация министрлигинин Евразия экономикалык биримдик маселелери жана ВТО менен иштөө бөлүмүнүн башкы адиси Анаркүл Беккулиева жооп берди.

Марал: Жети-Өгүздө дыйкандар сарымсак эгип, киреше табууну каалашкан экен. Бирок баалар төмөн болуп, өзүн-өзү актабай жатат деп тынчсызданып жатышат. Министрликтин мындан кабары барбы?

Анаркүл Беккулиева: Быйыл жаз мезгилинде айдоо иштери башталганга чейин кайсы аймакта, кандай эгин эгүү керектигин айтканбыз. Жер-жерлерде түшүндүрүү иштери жүргөн. Быйыл сарымсактын баасы түшүп кеткендиги менен макул эмеспиз. Эч жерде 15-20 сомдон сатылган жок, ички базарда деле андан жогору.

Марал: Дыйкандар биздин радиого кайрылып айтып жатышат. Алар сарымсакты сактаганга да жай жок деп, аргасыздан арзан сатууга макул болуп жатышкан экен.

Анаркүл Беккулиева: Айыл чарба продукцияларын сактаганга көпчүлүк эле аймактарда логистикалык борборлорду куруу пландары бар. Айрым аймактарда курулду. Ал эми баалар болсо жылына өзгөрүп турат. Бул базардагы бааларга жараша болот да.

Марал: Башка аймактарда да ушундай жагдайлар кездешерин угуп жүрөбүз. Эми эмне кылышат дыйкандар?

Анаркүл Беккулиева: Бул маселе боюнча мен сиздерден эле угуп отурам. Алар кайрылышса жеринен түшүндүрүү жүргүзөбүз. Мисалы, сарымсакты кайсы жакка, кандай баага сатууга болору жөнүндө толук маалымат беребиз. Негизи сарымсак жылына эле Казакстанга, Орусияга сатылат. Буга чейин баасы арзандап кетти деген кайрылуулар болгон эмес. Эгер кайрылышса, кайсы базарга алып чыгып сатышы керектиги боюнча кеңешибизди бере алабыз.

Рахмат!

Теманы улай эле, ушундай эле көйгөй башка дыйкандарда да болобу? Көбүнчө кайсы аймакта? Мындай учурда башка өлкөлөр кандай чара көрүшөт, ушул суроолор алкагында дыйкан Манас Саматовго суроо узаттык.

Марал: Өлкөнүн кайсы аймактарында дыйкандар түшүмүн сата албай калган учурлар кездешет?

Манас Саматов: Негизи сарымсак болобу, картошка болобу айыл чарба продукцияларын өндүрүүдө башаламандык бар. Жөнго салынган бир система жок. Дүйнө боюнча айыл чарба продукцияларына болгон муктаждык, анын наркы өзгөрүп турат. Ага прогноз жасоо үчүн өтө кенен маалымат болушу керек. Бул сөзсүз эле министрликте эмес, жеке менчик борбордо болушу керек. Бизде тилекке каршы, бул милдетти министрлик аткарсын деген түшүнүк бар. Бирок ал бүгүнкү министрликтин колунан келбейт, техникалык мүмкүнчүлүктөрү да жок. Эмне кылышы керектигин, айыл чарба тармагын билген мыкты адис да жок.

Марал: Ошентсе жа министрлик дыйкандарга алдын ала түшүндүрдү беле?

Манас Саматов: Бул баары бир деле кадр саясатына келип токтолуп жатат. Ал жерде айыл чарбасын билген бир да киши жок. Ошондуктан үмүт кылбай эле коюш керек. Мен бул боюнча айта берип уялып жа бүттүм.

Экинчи жагынан дыйкандар өздөрү да күнөөлүү. Маалыматты билбей туруп, ар кайсы эгинди эге беришет. Негизи ар бир жеке жактар өзүнүн эгинине өзү жоопкерчиликтүү да. Ошондуктан министрлик муну кылбай жатат деп нааразы боло бергендин кереги жок.

Comments are closed.

Марал Радиосу cможет принять любую посещаемость благодаря кешированию WP Super Cache