Шашылыш кабар:

Активисттер каршы чыгып, депутаттар сүрөп, Суракматов шайланды

Август 8th, 2018 | by Түмөнбай Абдинаби уулу
Активисттер каршы чыгып, депутаттар сүрөп, Суракматов шайланды
Саясат
0

Кыйкырыктар, нааразычылыктар Бишкек шаарынын мэрин шайлоо учурунда жаңырып, активисттер шаар башкармалыгынын имаратынын алдында кайрылуу жасап турушту. Мурдагы мэрди шайлаганда да аны колдоо ирээтинде өткөн митинг, бул ирет шаардык кеңештин депутаттарына нааразычылык көрсөтүүгө, алардын отставкасын талап кылууга айланды. Бирок бул көрүнүш мэрди шайлоого тоскоол болгон жок.

Калаа мэрин шайлоого шаардык кеңештин 45 депутатынан 44ү катышты. Көпчүлүк коалиция өзү көрсөткөн талапкердин батыраак шайланышын кааладыбы, айтор, анын программасын укпай туруп эле дароо добуш берүүгө өтүүнү сунуштап, шайлоо башталды. Анда депутаттардын ичинен бирөөсү гана жалгыз талапкер Азиз Суракматовдун шаар башчысы болуусуна каршы добушун берди. Эл өкүлдөрү бирдиктүү чечимдеринин себеби катары талапкердин программасы менен таанышып чыккандан кийин ага ишеним артып калышканын айтышты. “Мекеним Кыргызстан” фракциясынын депутаты Тимур Тюбеев Суракматовду ишкердик жагынан ийгиликке жетип, жакындарын толук кандуу камсыздалганын жакшы көрүнүш катары баалады. Анткени мындай абал коррупциядан оолак болууну камсыздайт. Ал шаар башчысынын кызматтык дарамети жөнүндө да сөз кылды.

-Мэрлик кызматта практика жана мыкты менеджер болуу кажет. Бул маселеде жаңы шайланган мэр эффективдүүлүгүн көрсөтө алат. Өзүңөр билгендей, шаардык кеңеш көзөмөлдөөчү орган болуп эсептелет. Ошол себептүү биз көзөмөлгө алып, анын жүргүзгөн ишине сереп салып турмакчыбыз. Эгер туура эмес жакка кетсе, ишенбөөчүлүк көрсөткөнгө укугубуз бар.

Жаңы шайланган талапкер Азиз Суракматов таза иштээрин айтып, убадасын берди. Ал аймактык шайлоо комиссиясынын чечими чыккандан кийин жолдорду жасоо боюнча иштерди тездетип, шаардагы транспорт маселесин чечүүгө киришерин айтты. Ошондой эле шайлана турган күнү эле каршылык көрсөткөн тургундар тууралуу да кеп кылып, алардын да оюн угарын, консенсуска келе тургандыгын билдирди.

-Алгач ишти курулуп жаткан жолдордогу жумуштарды тездетүү менен баштайбыз. Анткени сентябрда жолдогу кыймыл күч алат. Анда шаар тургундары үчүн тыгын жаралбашы керек. Ал эми мыйзамдагы кызыкчылыктар кагылышы боюнча айтсам, мен керектүү документтерди шайлоо комиссиясына бергем. Алар карап чыгып, маселе бар экенин айтса, мыйзамга шайкеш келтиребиз. Мен таза иштеп берем. Эки жылдык мөөнөтүм бар экен.

Саясат талдоочу Эмил Жураев депутаттардын дээрлик бир добуштан колдоп бергени демократия деген ат эле болбосо, ал түшүнүк дээрлик жок экенин далилдегенин айтты. Ал эми жаңы шайланган Суракматовду ийгиликтүү ишкер катары баалап, коррупциядан оолак болот дегенди суу кечпеген сөз катары баалады.

-Мындай кырдаалда депутаттардын: “Бул толук камсыздалган жана ал уурдабайт”,- дегени – жаш баланы алдагандай көрүнүш. Керек болсо миллиардерлер да уурдайт. Бир добуштан колдоп бергени бул – шаардык кеңештин ичинде эч ким күйүп-бышып, жарышып же башка пикирди кармангандардын жок экендигинин көрсөткүчү. Демократия деген аты эле болбосо, андай түшүнүк дагы деле жок экен.

Суракматовду колдогон депутаттардын катарында Жусупбек Коргонбай уулу да бар. Ал мэрлик кызматты көп балалуу энеге салыштырып, бардык көйгөйдү чечкенге үмүт артып жатканын билдирди. Ошондой эле жөнөкөй адам курулушчу болбостугун, анда жаратмандык өзгөчөлүк бар экенин да билдирди.

-Куруучу да жөнөкөй киши болбойт. Ал – жаратман. Көчөдөн эле бир кишини алып келип коё албайбыз. Шаарыбызды өнүктүрүшүбүз керек. Билими – архитектор, юрист. Кудай буюрса, бул кызматта да жакшы иштеп берерин үмүт кылып шайладым. Эми “мэр” деген көп балалуу энедей экен. Шаардын ар кайсы тармагында ар кандай көйгөй бар.

Эске сала кетсек, Бишкек шаардык кеңешинин көпчүлүк коалициясы мэрликке талапкер катары Азиз Суракматовду көрсөткөн. Азчылык оппозиция фракциялары жана премьер-министр да талапкер көрсөтүү укугуна ээ болгону менен эч кимди көрсөткөн эмес.

Comments are closed.

Марал Радиосу cможет принять любую посещаемость благодаря кешированию WP Super Cache