Шашылыш кабар:

Саматов: Жаңы жетекчини шайлоого Илмиянов келген жок

Саматов: Жаңы жетекчини шайлоого Илмиянов келген жок
Коом
0

Көк бөрү федерациясынын кезексиз съезди болуп, федерациянын президенти Икрамжан Илмиянов кызматынан кетти. Бул тууралуу аталган федерациянын жаңы дайындалган жетекчиси Жыргалбек Саматов «Марал» радиосуна кабарлады.

Саматов буга чейин Көк бөрү федерациясынын вице-президенти болуп иштеп келген. Илмияновдун кызматын тапшырышы жана федерациянын ишине байланышкан суроолорубузга Жыргалбек Саматов өзү жооп берди.

Марал: Көк бөрү федерациясынын президенти качан алмашты жана сизди федерациянын жетекчилигине ким көрсөттү?

Жыргалбек Саматов: Федерациянын президентин шайлоо кечээ, 5-июлда болуп жети облустан жана эки шаардан делегаттар келди. Баардыгы менин талапкерлигимди бир добуштан колдошту. Ал эми федерациянын жетекчилигине мени өзүлөрү көрсөтүштү. Менден башка дагы 1-2 талапкер чыгып, шайлоодо менин талапкерлигимди жактырышты.

Марал: Федерациянын мурдагы президенти Икрамжан Илмиянов кыматын эмне себептен тапшырды жана ал жаңы жетекчини шайлоого катыштыбы?

Жыргалбек Саматов: Икрамжан Илмиянов үй-бүлөлүк шартына жана ден соолугуна байланыштуу кызматтан кетти. Федерациянын жаңы президентин шайлоого өзү катышкан жок.

Марал: Илмияновдун кетишин айрымдар учурдагы саясий кырдаалга байланыштырып жатышат. Бул канчалык негиздүү?

Жыргалбек Саматов: Биздин көз карашыбызда Икрамжан Илмияновдун кызматтан кетиши эч кандай саясатка байлыныштуу эмес. Саясат жок. Айтып жаткандай эле ден соолугуна жана үй-бүлөлүк шартына байланыштуу гана кетти.

Марал: Сентябрда III Дөйнөлүк көчмөндөр оюну болот. Анда көк бөрү элдин бүйүрүн кызытат эмеспи. Дал ушул улуттук ат оюнунун баардыгыбыз күтүп көрөбүз. Даярдыктар кандай?

Жыргалбек Саматов: Туура айтасыз. Азыр элибиздин сүймөнчүлүгүнө айланган оюн бул көк бөрү. Даярдыктар болсо жакшы. Буюрса көк бөрү боюнча курама командабыз 10-12-июлдан тарта даярдыктарга чыга башташат. Федерация ушуга байланыштуу дагы кезексиз съездге чогулду. Дөйнөлүк көчмөндөр оюнуна чейин Эгемендүүлүк майрамы бар. Анда президенттин кубогу ойнотулат.

Андан сырткары быйыл биздин федерациянын 20 жылдык юбилейи, көк бөрүнүн Юнеского катталганына 1 жыл болот. Ушуга байланыштуу дагы федерациянын кезексиз съездин чакырып, президенттин отставкасы кабыл алынып, жаңы президент шайланды.

Марал: Көк бөрү федерациясынын бюджети кандай, ким тараптан каржыланат?

Жыргалбек Саматов: Бул коомдук бирикме болгондуктан эч жактан, эч кимден каржыланбайт. Бирок ар кандай мелдештер, иш чаралар өтүп калганда байге фонду мамлекет тарабынан каржыланат. Болбосо эч жактан бир сом дагы берилбейт.

Маалымат үчүн: Икрамжан Илмиянов экс-президент Алмазбек Атамбаевдин мурдагы кеңешчиси болуп иштеген. Ал КСДП партиясынын саясий кеңешинин мүчөсү. Көк бөрү федерациясынын президенти болуп 2017-жылдын апрель айында шайланган.

Жыргалбек Саматов «Республика-Ата Журт» фракциясынан VI чакырылыштын депутаты болгон. Бирок кийин анын кош жарандуулугу бар экени аныкталып, Борбордук шайлоо комиссиясы мандатынан ажыраткан.

Comments are closed.

Марал Радиосу cможет принять любую посещаемость благодаря кешированию WP Super Cache