Бишкекте 2 бала бакча мамлекетке кайтарылат

2019- жылы борбор калаада 2 бала бакча мамлекетке кайтарылат. Бул тууралуу Бишкек шаарынын вице-мэри Асел Куланбаева “Марал” радиосуна берген маегинде билдирди.

Анын айтымында, жеке менчикке өтүп кеткен бала бакчаларды мэриянын карамагына өткөрүү иштери улантылып жатат. Быйыл бир бала бакча кайтарылган. Бишкек мэриясы комиссия түзүп социалык объектилердин баарын кыдырып чыккан.

«Мектеп менен бала бакча салуу негизги маселебиз. Балдарды бала бакчага кабыл алуу  электрондук кезек менен жүрүп жатат. Бирок бала бакча жетишсиз болгондуктан кезек күткөндөр абдан көп. Ар бир конушта бирден мектеп жана бала бакча болушу керек. Бирок 47 конуштун 20сында гана аталган мекемелер бар», — дейт Куланбаева.

Ал белгилегендей, мамлекет тарабынан бала бакчада тарбияланган ар бир баланын тамагына 60 сом бөлүнөт. Анын 50%ын ата-энелер төлөйт. Мындан сырткары ата-энелердин коомдук фондуна дагы каражат чогултулат.