Шашылыш кабар:

Осмонов: «Ким Чен Ын менен Трамп тарыхты өзгөрттү»

Июнь 12th, 2018 | by Канай Анаркулов
Осмонов: «Ким Чен Ын менен Трамп тарыхты өзгөрттү»
Күн чекит
0

Бүгүн  АКШнын президенти Дональд Трамп менен Түндүк Кореянын лидери Ким Чен Ын Сингапурдун Сентос аралында жолугушту. Кореяны өзөктүк куралдан баш тарттыруу башкы максат экени айтылган. Эки тараптуу документке кол коюуга 40 мүнөт кетти. Сүйлөшүүлөргө өлкө башчыларынан сырткары бир катар аткаминерлер, котормочулар катышты. Трамп Ким Чен Ын менен “жекеме жеке” жолугушуу абдан жакшы өткөнүн, алардын ортосунда мамиле жакшы деңгээлде экенин айтты. Эми мамилелер жаңы нукта өнүгөөрүн эки тарап тең белгилеп, саммиттин жыйынтыктоочу документине кол коюшту. Мына ушул саамалыктын алкагындагы окуялар тууралуу  эл аралык маселелер боюнча эксперт Жолдош Осмонов менен маектештик.

Бул жолугушууга  дүйнөлүк коомчулук болуп көрбөгөндөй жана тарыхый жолугушуу деген баасын берип жатат. Сиздин буга пикириңиз кандай, жолугушуулар кандай өттү?

-Түндүк Корея өзүнчө мамлекет болуп бөлүнгөндөн кийин  булар карама-каршы туруп келген. 60-70 жылдан бери тарыхта алардын жолушуусу боло элек эле. Ошондуктан бул туура баа. Тарыхый жолугушуу болду. Эки өлкөнүн биринчи саммити өттү.

Негизи мындай олуттуу маселелер жарым жыл, бир жылдап даярдыктын, протоколдук документтин арты менен ишке ашаары маалым. Бул жерде Трамп бизнестин кадамы менен иштеп жаткандай. Мына ошол себептүү документтердин мазмуну ачык айтылбай, жолугушуудан майнап чыкпай каларын айткан  талдоочулар болуп жатат. Сиз буга кандай карайсыз? Чындап эле эмнеге документтер жашыруун болуп жатат? 

Трамп келгенден баштап эле саясатты башкача жүргүзүп жатканы маалым. Чындап эле бул жолугушууларды уюштуруу үчүн канчалаган жылдар кетип, аракеттер болгон.  Сүйлөшүүлөр жүрүп, эксперттер талкууга алып, жалпыга маалымдоо каражаттары байма-бай жазып калышчу эле. Бул ирээт Дональд Трамп кыска убакыттын ичинде мындай чечим кабыл алып, чоң секирик жасап койду. Ага карабастан расмий доку менттер ачыкка чыга элек. Бул иштин жыйынтыгы болбой калат деген күмөн ойлор да бар. Себеби АКШнын президенти өзүнүн чечимдерин бат эле алмаштырып коёт. Буга жолугушуу болот, кайра үч жума калганда жолукпайм, кийин кайрадан жолугам деген чечимдери далил. Бул Трамптын стили окшойт. Аткени ал биринчи жолугушууларга мамлекеттик департаменттин кишилеринин ордуна Борбордук чалгындоо агенттигинин кызматкерлерин жөнөткөнү да белгилүү. Бул Америка президентинин эл аралык мамиле курууда өзүнүн өзгөчө стили десек жаңылбайбыз. Эми расмий маалыматтарды дагы күтө туралы.

“Бул эки лидер маселе чечпей эле, өздөрүнө PR жасап жатат” дегендер да четтен чыгып жатат?

Ар бир саясий чечимдин аркасында сиз айткан өзүн жарнамалоо кошо жүрөт. Өзгөчө эл аралык деңгээлде. Азыр Донаьлд Трамп Европа, өзүнө жакын делген Канада мамлекеттери менен келишпей, бир катар көйгөйлөр менен жашап жатышпайбы. Мына ошонун фонунда, “мен тышкы саясатты олуттуу жүргүзө алам, колумдан буга чейинкилердин колунан келбеген нерсе келет” дегендей таасир калтыруу жолу да болушу ыктымал.

Бул жолугушуу башталгыч тепкич болду. Бирок өзөктүк куралдан баш тартуу болгон жок.  Башка документтер да ачыкка чыкпай жатат. Анан бул миссия аягына чыгарына ишенесизби ? Эгер эки тарап келишип калса, ким эмне утуп, эмне жоготот?

Менимче бул эң алгачкы маанилүү кадам. Анын аркасында канчалаган эмгектер жасалган. Дагы көп иштер күтүлүп жатат. Ошондуктан, эмне болуп кетерин эч ким айта албайт. Бирок, менде эл аралык мамилелерде системалуу алмашуулар болуп, жаңылык алып келет деген ой турат.

Маегиңизге рахмат.

Comments are closed.

Марал Радиосу cможет принять любую посещаемость благодаря кешированию WP Super Cache