Шашылыш кабар:

Чиновниктердин декларациясы дыкат текшерилет

Июнь 8th, 2018 | by Анара Бакытбекова
Чиновниктердин декларациясы дыкат текшерилет
Саясат
0

Айрым аткаминерлердин хансарайлары тууралуу видео-тасма чиновниктердин декларациясын кайра текшерүү маселесине себеп болду.  Эл өкүлү Камчыбек Жолдошбаевге таандык делген 2,5 миң гектар аянт жер тилкесине салынган чоң үйдүн тасмасы интернет колдонуучулар ортосунда чоң талкуу жаратты. Анткени мындай хан сарай Жолдошбаевдин мүлкү тууралуу декларациясында көрсөтүлгөн эместиги айтылууда. Мындан улам салык кызматы чиновниктердин салык декларациясын 1-июлдан кийин кайра текшермей болууда.


1-июлдан тарта салык кызматы мамлекеттик кызматкерлердин салык декларацияларын текшерүүнү баштайт. Ошону менен бирге Жогорку Кеңештеги «Өнүгүү-Прогресс» фракциясынын депутаты Камчыбек Жолдошбаевдин үйү жана мүлкү да текшерилет. Бул тууралуу салык кызматынын басма сөз катчысы Эркин Сазыков билдирди.

Анын айтымында, мамлекеттик кызматкерлер 2017-жылдагы декларациясын ушул жылдын 1-апрелине чейин ташырууга  тийиш болгон. Ал эми ошол толтурган декларациясына өзгөртүүнү жана толуктоолорду 30-июнга чейин киргизе алат.

— Андан кийин толтурулган салык декларациядагы маалыматтар текшериле баштайт. Эгерде кызматкерлер мүлкүн туура эмес же так көрсөтпөгөнү аныкталса, анда документ Башкы Прокуратурага өткөрүлүп берилет.

Буга чейин жергиликтүү маалымат булактарынын бири борбор калаанын престиждүү бөлүгүндө жайгашкан 2,5 гектар аймакка салынган чоң үй депутат Камчыбек Жолдошбаевге таандык экени айтылган. Ал үйдө чындыгында эле аты аталга депутат жашарын анын жардамчысы жана турак жайдын күзөтчүлөрү бышыкташкан.

Журналист: Бул үйдө Жолдошбаев жашайбы?

Турак жайдын күзөтчүлөрү : Ооба

Журналист: Мага Жолдошбаев керек эле. Ал үйдөбү?

Турак жайдын күзөтчүлөрү : Ооба, азыр үйдө.

Журналист: Үйгө кайсы жак менен киремин?

Азыр коомчулукта бул үй эл өкүлүнүн мүлкү тууралуу декларациясында көрсөтүлгөн эместиги айтылууда. Мындан улам депутат Камчыбек Жолдошбаевге бир нече жолу телефон чалып, бирок байланышууга мүмкүнчүлүк болгон жок.

Буга чейин Кыргызстанда мамлекеттик кызматтарда иштеп жаткандардын киреше жана чыгашаларын аныктоо боюнча декларацияны  Мамлекеттик кадр кызматы кабыл алчу. Бирок бул кызмат 2017-жылдан баштап Салык кызматына өткөрүлүп берилген7 Мындан улам Мамлекеттик кадр кызматынын жетекчиси Акрам Мадумаровго кайрылып, депутаттын декларациясында талкуу болгон чоң үйү эмнеге көрсөтүлбөй калагын сурап, кайрылдык.

-2015-жылга чейинки кабыл алынган декларацияларды салык кызматына өткөрүп бергенбиз. Анда Жолдошбаевдин үйү көрсөтүлгөн же көрсөтүлбөй калганын биле албаймын. Анткени архив да өткөрүлүп берилген.

Буга чейин Коопсуздук кеңештин катчысы Дамир Сагынбаев журналисттерге мамлекеттик кызматкерлердин салык декларациясын текшерүүдө жалган маалыматтар аныкталса, ал Башкы Прокуратурага өткөрүлүп берилип, ага юридикалык баа берилерин билдирген.

Камчыбек Жолдошбаевдин үйү Бишкекте «Жал» кичи районунда жайгашкан. Кадастр жана кыймылсыз мүлктү каттоо департаментинин маалыматына ылайык, үй «Беш Сары» компаниясына катталган . Бул компанияга депутат өзү ээлик кылат.

Жолдошбаевдин салык декларациясына ылайык, ал 2015-жылы 90 миң сом киреше тапкан. 2016-жылы  болсо 784 миң сом киреше кирген.  Мындан тышкары, ал бир катар компанияларга ээлик кылат. Ошондой эле борбор калаадагы Ош базарында жайгашкан «Беш Сары» соода борбору да депутатка тиешелүү.

Жогорку Кеңештин IV чакырылышынын депутаты Гулжамал Султаналиева эртең эл өкүлү Жолдошбаев үйүн мамлекеттик кызматта иштебей турган мезгилде алганмын деп коюшу мүмкүндүгүн айтты.  Бул салык декларациясынын формаларын толтуруу жетиштүү болбой жатканын түшүндүрөт дейт.

— Бирдиктүү салык декларациясынын формалары жетиштүү эмес, аны кайра иштеп чыгуу зарыл. Электрондук декларациянын системасы толук кандуу иштей турган деңгээлде эмес жана анда көп коркунучтар бар. Мамлекеттик кызматкерлердин киреше-чыгашасы ачык-айкын болушу керек дейбиз. Бирок мамлекеттик салык кызматы бардык маалыматты ачыкка чыгарбайт. Учурда биринчи кадам ташталып, саясий эрк пайда болду, бирок аягына чыгаарынан күмөнүм бар. Бирдиктүү салык декларациясы боюнча башка өлкөлөрдүн тажрыйбасын карап, мамлекеттин өзгөчөлүктөрүнө жараша туура чечимдердин кабыл алынуусу шарт.

Юристтер депутаттын чоң үйү декларациясына киргизилбей калуусунун ар кандай себептери болушу мүмкүн деп атады. Мисалы, үй баласына же кызына катталып калышы ыктымал. Аны депутат декларациясында көрсөтүүгө милдеттүү эмес.

Юрист Нурбек Токтакуновдун айтымында,  аткаминерлер салык декларациясын толук жана туура көрсөтпөсө жоопкерчиликке тартылат. Бирок тиешелүү мыйзам иштебей келет.  Жолдошбаевдин үйүнүн баасын жана кирешесин эсептеп туруп, анын айырмасын чыгарып, салык төлөбөдү деген негизде кылмыш жоопкерчилике тартса болот.

-Мурун АКШда Аль Капоне деген белгилүү гангстер бар болчу. Аны мамлекети кылган кылмышы үчүн кармай албай, кирешеси менен чыгашасынын айырмасын эсептеп, ага салык төлөбөдү деп камак койгон. Ушул практика менен биздин депутатты деле камаса болот. Жолдошбаев кылмыш кодекси менен жоопкерчиликке тартылат. Мындай аракетти ушундай депутат, министрлерден башташ керек.

Укук коргоочу Рита Карасартова эгерде депутат Камчыбек Жолдошбаевдин декларациясында көрсөтүлгөн маалыматтар менен каттоо кызматындагы маалымат бири-бирине дал келбесе, анда коррупция катары эсептелээрин билдирди.

Анын айтымында, мамлекет салык декларациясын кабыл алып, аны көзөмөлдөөдө жетиштүү чаралар аныкталган эмес. Мисалы, салык кызматы чиновниктердин толтурулган декларациясын кабыл алып, текшерет, бирок көзөмөлдөгөнгө укугу жок.

-Учурда Башкы Прокуратурада иштеген чиновниктердин декларациясы жабык болот. Ал эми президент, депутат жана премьер-министрдин кирешеси ачык көрсөтүлөт. Эмне үчүн коррупция менен күрөшкөн көзөмөл органында иштегендердин декларациясы жабык болушу керек? Бул дагы өзүнчө бир сруоону жаратат.

Бүгүнкү күндө декларацияны өз убагында тапшырбагандыгы үчүн жеке жактарга 2000 сом жана юридикалык жактарга 10000 сом өлчөмүндө административдик айып салынат.

Comments are closed.

Марал Радиосу cможет принять любую посещаемость благодаря кешированию WP Super Cache