Шашылыш кабар:

Бишкекте 2 жылда эч нерсе өзгөргөн жок (Элдик пикир)

Апрель 25th, 2018 | by Айжамал Худайбердиева
Бишкекте 2 жылда эч нерсе өзгөргөн жок (Элдик пикир)
Талаш талкуу
0

Айрым Массалык маалымат каражаттары өздүк булактарына таянып Бишкек шаарынын мэри Албек Ибраимов кызматтан кетүү тууралуу арыз бергенин жазып чыгышты. Анда айтылгандай калаа башчысы Бишкек шаарынын 140 жылдыгын белгилөөдөн кийин жумуштан кетет. Ал эми Бишкек шаарынын мэриясынын басма сөз катчысы Калперизат Айдарбекова мэрдин отставкасы тууралуу айтылып жаткан сөздөр чындыкка дал келбесин, алар учурда Бишкектин 140 жылдыгын өткөрүүгө даярданып жатышканын айткан.

Албек Ибраимов калаа башчылыгына 2017-жылдын январь айында экинчи мөөнөткө шайланган. Мэрди шайлоо митинг менен коштолуп, мэрликке дагы бир талапкер Нурдин Абдылдаев шайлоо басым менен өткөнүн айтып чыккан.

“Марал” радиосунун “Талаш талкуу” программасында “Бишкек шаарынын мэриясынын акыркы эки жылдагы тагыраак айтканда, Албек Ибраимов жетектеп турган аралыктагы ишине канааттанасызбы?” деген суроонун алкагында угармандардын пикирин угуп көрдүк. Берүүнү Рита Мукалаева алып барды.

Байланышкан угармандардын 76% Бишкек шаарынын мэри Албек Ибраимовдун ишине канааттанбайт. Алардын пикиринде, калаа башчы эки жылда эч нерсе өзгөртө алган эмес. Жолдор оңдолуп жатканы менен иштер ирээтсиз жүрүп жатат.

Ал эми үч угарман калыс пикирин билдирсе, дагы үчөө калаа башчынын иши канааттандыраарын айтат. Алар, Ибраимов жасаган иштердин жыйынтыгын көрүү үчүн ага убакыт бериш керектигин белгилешет.

Whatsapp:
— Кызык, Ош базарын ирээтке келтирүүгө кайсы мэрдин эрки жетет. Калаа башчынын ишин канааттандыраарлык эмес деп ойлойм.

— Албек Ибраимов жаңы эч нерсе жасаган жок. Жолдор ал келгенге чейин эле оңдолуп башталган. Анын ишин канааттандараарлык эмес деп эсептейм.

— Канааттандырган жок.

— 9 миң сомдук көчөттөр өскөнчө күтүш керек! Канааттандырган жок.

Дайырбек:
— Мен калаа башчынын ишине канааттанбайм. Ал кайсыл бир жагдай жаралган соң ишке киришет. Мэрия шаардын коопсуздугун камсыздабайт. Эки жылда аткарган жакшы ишин көргөн жокмун. Болгону элдин үстүнө дарак кулап жатат. “Жашылдандыруу” ишканасы менен биргеликте иштеши зарыл эле. Мэрия аларды көзөмөлгө алса болмок.

Асыл:
— Жолдордун абалы начар. Эмне үчүн бузулган жолдорду ондошпойт да жакшы жолдорду кайрадан карап жатышат. Жумушту кытайлыктар аткарып жатканын түшүнө албайм. Кыргыздардын колунан келбейби? Кытай жумушчуларын көрүп жатам, мен жашаган жакта иштегендер эч нерсе кылбай эле отурушат. Биздин кыргыздар деле эч нерсе жасабай отура алат. Калаа башчынын ишине такыр канааттанбайм. Бир гана жаңы жылдык балатыларды жакшы кооздой алышты өңдөнөт. Менин мэрия иштеген тааныштарым байышты. Мурда бир үйү болсо, азыр бир канча турак жайы бар.

Таалай:
— Мэр өзү жашаган көчөгө афсальт төшөдү, башка эч нерсе кылган жок. Мен ага жакын жашайм. Башка жолдордун абалы начар. Ал эми абалы жакшы болсо да Чыңгыз Айтматов проспектисин жыл сайын ондошот. Бул эмне президентке көрсөтүш үчүнбү? Баха көчөсүндө таштанды урнасын алып салганда, кызматкерлерден сурасам, ал жерди президент текшергендиктен урналарды алып салганын айтышты. Мэрдин жумушу толук канааттандырбайт.

Мирлан:
— Жолдордун мэрдин салымы менен оңдолуп жаткан жок. Жол шаардык бюджеттен эмес, кытайлык карыздардын эсебинен курулуп жатат. Насыя алып баары кыла алат. Кытайлар салган жолдун сапаты начар.

Азамат:
— Көп сөз айтпайм. Эки жылда шаарда эч нерсе өзгөргөн жок.

Ильяз:
— Өзүм айдоочу болуп иштейм. Жолдорду эрте ондоп башташты. Каникул убагында аткарышса болбойт беле? Эми бардык жерде тыгын. Чоң жолдорду жаап салышты.

Эркин: 
— Мэрдин иши канааттандырбайт. Жолду оңдоп жаткандар кечки саат алтыга чейин эле иштешет. Ушунтип иштесе жумуш бүтмөк белет. Түнү да иштешсе болмок. 9 миңден көчөт сатып алган акылга сыйбайт. Иса Өмүркуловдун убагында 2 миң сомдон гүл алышкан. Ошол гүлдөр каерди көрктөндүрүп жатат? Калаа башчынын иши канааттандырбайт.

Угарман:
— Ибраимов иштеп жаткандай. Курулуштар жүрүп, жолдор оңдолуп жатат, бирок шаардын көркү сакталбай, имаратттар ирээтсиз курулууда. Бир көчөттү 9 миң сом алганы кандай, 900 сом болсо да мейли эле. 84 гектар жерди жеке менчикке бериптир. Мен мэр аракет кылбай жатат дегенден алысмын. Бирок иштегени менен жыйынтык ушундай болуп жатат. Бишкек борбор калаа экени сезилбейт.

Марат:
— Мэр такыр иш жасабай жатат деп айтуудан алысмын. Буга чейинки калаа башчыларына салыштырмалуу жакшы эле иштеп жатат. Шаардын жолдорун түнү да оңдоого болот. Себеби шаарда унаа көп.

Чыңгызхан:
— Мэрдин иши канааттандырат. Калаа башчылар шаардын өнүгүүсүн каалайт. Иштеп жатышат. Кемчиликтери менен кошо жетишкендиктерин да караш керек. Мэрия көчөлөрдү оңдоп, кесилген дарактардын ордуна жаңысын отургузуп жатат. Мэр иштеп жатат. жыйынтык алуу үчүн убакыт берүү зарыл. Ибраимов да калааны өнүктүрүүнү ойлоп, үйүндө тынч отурбайт.

Comments are closed.

Марал Радиосу cможет принять любую посещаемость благодаря кешированию WP Super Cache